ဒီ ပိုစ့်လေးကို ကျနော်ရဲ့ အစ်ကိုတစ်ဦးဖြစ်တဲ့ ကိုလူပျိုကြီးက ပေးပို့လိုက်တာပါ…
သူရဲ့ ဘ၀ ခံစားချက်လေးကို ဖတ်ရှုပြီး ရင်ထဲမှာ တစ်မျိုးသော စိတ်ခံစားမှု လေး ရမယ်လို့ ယုံကြည်စွာနဲ့ ကျနော်ရဲ့ ဘလောစ့် မှာ တင်ပေးလိုက်ပါတယ်..
(ဒီPost သည် ကျနော်၏ ဆရာ/သူငယ်ချင်း/ညီလေး ဖြစ်သူRonney Zar ၏တောင်းဆိုမှု၊ ဒီBlog ပိုင်ရှင်SMH ၏ခွင့်ပြုမှုဖြင့် ဖြစ်ပေါ်လာခြင်းဖြစ်ပါသည်။)
ယခုကျနော်တင်ပြမည့် အကြောင်းအရာများသည် စိတ်ကူးယဉ်များမဟုတ်ကြောင်း ဦးစွာအစီရင်ခံပါသည်။
ဖြတ်သန်းခဲ့ရသည့် ဘ၀တစ်ကွေ့အတွေ့အကြုံများတွင် သူငယ်ချင်းများ၏ဖြစ်ရပ်မှန်များကို ထည့်သွင်းဖော်ပြ ထားပါသည်။ ကာယကံရှင်များ၏ လက်ရှိဘ၀များတွင် အနှောက်အယှက်မပြုလိုခြင်းငှာ အမည်များပြောင်းလွဲ ထားပါကြောင်းဝန်ခံအပ်ပါသည်။
ကျနော်သည် ဆရာသမားများ၏အားပေးထောက်ခံမှုဖြင့် ရန်ကုန်တွင် (ရန်ကုန်ဟုဆိုက လိုနေပါတယ် မြန်မာပြည်ဟုဆိုမှလုံလောက်မည်ထင်ပါတယ်) နာမည်ကြီးသော ၀န်ထမ်းဦးရေ ၅၀၀ ကျော်ခန့်ဖြင့် လည်ပါတ် နေသော IT company ကြီးတစ်ခု၏ ယောင်္ကျားလေးများ အများဆုံးတက်သော သင်တန်းဘာသာရပ်များတွင် အကူဆရာအဖြစ်အလုပ် လုပ်ခွင့်ရခဲ့စဉ်ကဖြစ်ရပ်များပါ။
ကျနော်လုပ်ကိုင်ရသော Centre သည် Company တစ်ခုလုံး၏ဌာနချုပ်ဟုဆိုရမှာဖြစ်ပါတယ်။ MD နှင့် Director များ ရုံးထိုင်သောကြောင့်ပါ။ သင်တန်းကျောင်းဖြစ်သည်နှင့်အညီ ဆရာ/ဆရာမများ၊ ၀န်ထမ်းများ၊ ကျောင်းသား/ကျောင်းသူများဖြင့် ပျားပန်းခပ် လှုပ်ရှားနေရာ ရန်ကုန်မြို့လည်ခေါင်မှနေရာဖြစ်သည်။
ဌာနမှူးမှာ ကျနော့်ဆရာအရင်းဖြစ်သည် အလုပ်ဝင်ဖြစ်သည်မှာလည်း သူ၏တိုက်တွန်းမှုကြောင့်ဖြစ်သည်။
လူပုသော်လည်း စိတ်ရှည်သူဖြစ်သည်၊ အရည်အချင်းရှိသူဖြစ်ပြီး အုပ်ချုပ်မှုလည်းကျွမ်းကျင်သူဖြစ်သည်။ သို့သော် ကျနော်အလုပ်ဝင်ပြီး မကြာခင်မှာပင် တပည့်မကောင်းဆရာခေါင်း ဆိုသောရှေးစကားကိုလက်တွေ့ ပြသွားသူဖြစ်သွားခဲ့ရသည်။ ဆရာနဲ့ ကျနော်ဝေးခဲ့ရသည်။
နောက်ထပ်ကျနော့်ဆရာတစ်ဦးတော့ ကျန်ခဲ့သေးသည်၊ သူသည် ကိုယ်လုံးကိုယ်ထည် သေးသေးညှက်ညှက် မျက်မှန်လေးတ၀င့်ဝင့် ပြုံးစိစိနှင့်နေတတ်သူတစ်ဦး။ ကျနော်သည် သူ၏အကူအညီဖြင့် များစွာသော လုပ်ငန်းခွင်အသိများကိုရခဲ့ပါသည်။ သူသည် Ronney Zar ပင်ဖြစ်ပါတော့သည်။
စိတ်သဘောထားကောင်းမွန်ပြီး အမြဲတမ်းပျော်ပျော်ရွှင်ရွှင်နေတတ်သော ကျနော့်ဆရာ Ronney Zar တွင် အဲဒီ အချိန်က ချောမောပြေပြစ်လှပပြီး စကားပြောရှင်းလင်းပြတ်သားသော ချစ်သူတစ်ဦးရှိခဲ့ပါသည်။ (နောင်တွင် အဲသည့်မိန်းကလေးနှင့် ကျနော်ဌာနတစ်ခုတည်းတွင် အတူအလုပ်လုပ်ကြရ၍ မောင်နှမများ ကဲ့သို့ အလွန်ပင်ရင်းနှီးခဲ့ရပါသည်။) သူ့ကို Simple Zar ဟု နာမ၀ိသေသနပြုပါရစေ။
ကျနော်သည် ထိုအချိန်အထိ တရားဝင် ချစ်သူရည်စားမရှိခဲ့သေးပေ၊ သို့သော် ရင်ထဲမှာချစ်ထားရသော မိန်းကလေးတစ်ဦးတော့ရှိခဲ့သည်၊ အဲဒီအချိန်က သူမကိုကျနော့်ရင်ထဲထည့်ထားခဲ့သည်မှာ (၆)နှစ်ကျော်ခဲ့ ပြီဖြစ်သော်လည်း ကျနော် သူမကိုဖွင့်မပြောခဲ့ရသေးပေ၊ အဘယ်ကြောင့်ဆိုသော် ပါတ်ဝန်း ကျင်သည် နီးစပ်လွန်းနေသည့်အပြင် ကျနော့်ကြောင့် အမှားအယွင်းတစ်ခုခုဖြစ်ခဲ့ပါက လူမှုဆက်ဆံရေးအသိုင်း အ၀န်းကိုပါ ထိခိုက်လာနိုင်သောကြောင့်ဖြစ်သည်၊ ထို့ပြင် ကာယကံရှင် ထိုမိန်းကလေးမှလည်း ကျနော့်ကို ထိန်းထိန်း သိမ်းသိမ်းဖြင့် ဆက်ဆံနေသောကြာင့် စိတ်ထဲတွင် ယတိပြတ်မဝေခွဲနိုင်သောကြောင့်လည်းဖြစ်ပါတယ်။ ဖွင့်ပြောလိုက်၍ အဆင်ပြေနိုင်သည် မပြေနိုင်သည်ကို မခန့်မှန်းနိုင်။
အဆင်ပြေသည်ဆိုပါစို့ ကျနော့်အတွက်စိတ်ချမ်းသာမှုရမည်မှန်သော်လည်း ကျနော်တို့(၂)ယောက်စလုံးအတွက် လွတ်လပ်မည်မဟုတ်၊ မိသားစုအသိုင်းအ၀ိုင်း(၂)ခုကြား လွတ်အောင်မနည်းရှောင်ရမည်၊ ကံမကောင်း ၍ လူမိသွားပါက အားလုံးပြသနာတက်၍အဆုံးသတ်ရမည့်အဖြစ်ပါ။
အကယ်၍ဖွင့်ပြောလိုက်၍အဆင်မပြေဘူးဆိုကြပါစို့၊ အဲသည့်ဒဏ်ကို ကျနော်မခံနိုင်သေးပေ၊
အဲဒီ အတွက် YES or NO အဖြေ(၂)ခုကြား NO ကိုရင်မဆိုင်နိုင်သေးသဖြင့် အဖြေရအောင်မကြိုးစားခဲ့ပါ။
ချစ်တာကတော့ တကယ်ချစ်တာ၊ ဘာကြောင့်ချစ်တာလည်း၊ ဘာလို့ချစ်တာလည်းလို့တော့မသိ။ သူမျက်နှာကြည့်ပြီး သူဘာလိုနေသလဲ၊ စိတ်ထဲဘာဖြစ်နေသလဲဆိုတာကို ကျနော်အလိုလိုသိတဲ့ အတတ်ပညာ တစ်ခုကိုရခဲ့ပါတယ်။ စိတ်ထဲမှာထည့်ထားခဲ့ရတဲ့(၆)နှစ်ဆိုတဲ့ ကာလအတွင်းမှာ ပါတ်ဝန်းကျင်ကနီးစပ်လေတော့ သူ့မျက်နှာအမြဲကြည့်ပြီး သူလိုတာထင်သမျှ လုပ်ပေးချင်နေတော့ ပိုတာလေးတွေတော့ရှိတာပေါ့၊ (ကျနော်ကသာ သတိမထားမိတာ ကျနော်တို့ ၀န်းကျင်က အဲသည့်အချိန်ထဲက သတိထားမိနေကြပါသည်၊)
ကျနော်အဖြစ်က ဆိုခဲ့တဲ့ IT company မှာ အလုပ်ဝင်တဲ့အချိန်မှာ ဟိုမရောက် ဒီမရောက်နဲ့ ရင်ထဲမှာချစ်ခဲ့ရတာ (၆)နှစ်ကျော်ခဲ့တဲ့အချိန်ပေါ့။
အဲဒီမှာ ကျနော့်သူငယ်ချင်း Ronney Zar (သူငယ်ချင်းလို့ပဲသုံးမှဖြစ်တော့မယ်၊ ကျနော်ကသူ့ကိုဆရာလို့ ခေါ်ရင် သူကမကြိုက်လို့ပါ၊ နည်းမျိုးစုံနဲ့ ကန့်ကွက်လို့ပါ)ကို ကျနော်တကယ်ပဲအားကျခဲ့ရပါသည်။ Ronney Zar နဲ့ Simple Zar တို့ချစ်ဇာတ်လမ်းက လည်း တကယ့်ကို အားကျဖွယ်ကောင်းအောင် ချစ်ခြင်းတွေနဲ့ထုံမွှန်းထား ခဲ့တာကိုး။ Simple Zar ကိုနှောက်ယှက် သူတွေကို သူ့ရဲ့အားကောင်းမောင်းသန် ဗလကြီးနဲ့ ကာကွယ်ခဲ့တာတွေ။
Simple Zar စီးမယ့် Bus ကားအတွက်နေရာရအောင် ဂိတ်စကကြိုစီးပေးပြီး နေရာဦးပေးခဲ့ရပုံတွေ (ကျနော် အမှတ်မမှားဘူးဆိုရင် မြောက်ဥကလာအ၀ိုင်းမှတ်တိုင်ထင်ပါတယ်၊ အဲသည့်မှတ်တိုင်က အမြဲလူကြပ်တယ်လေ)
နောက်တစ်ခါ စီးကရက် အရမ်းသောက်တဲ့သူ့ကို Simple Zar ကဆေးလိပ်ဖြတ်ဖို့မတားဘဲ လျှော့သောက်ဖို့ အကြံပေးခဲ့တာတွေ၊ အစရှိသဖြင့်ပေါ့လေ၊ ကြားရသမျှ အားလုံးဟာစိတ်ချမ်းသာစရာတွေဖြစ်ခဲ့ရသလို၊ ထမင်းစားချိန်၊ ရုံးဆင်းလို့အိမ်ပြန်ချိန်တွေမှာ Ronney Zar ကထမင်းချိုင့်လေးကိုင်ပြီးကားမှတ်တိုင်လိုက်ပို့ခဲ့ရ တာတွေကိုမြင်ရသမျှ မြင်ကွင်းတွေဟာလည်းကြည်နူးစရာတွေပါပဲ။
ကံကြမာမုန်တိုင်းက တကယ်မွှေရင်နာဂစ်ထက်အဆပေါင်းများစွာပြင်းပါတယ်၊ နှစ်အနည်းငယ် ချစ်ရည်လူးခဲ့ကြ တဲ့ Ronney Zar တို့အတွဲလေး ဘယ်သူ့ ဘယ်သူအပေါ်မှာမှ သစာဖောက်လို့မဟုတ်ကြပဲ အခြေအနေအရပ်ရပ် ကြောင့်လမ်းခွဲခဲ့ကြရပါတော့သည်။
ကျနော့်မျက်စိရှေ့မှာတင်ချစ်နေကြရာက ကျနော့်မျက်စိအောက်မှတင် အချစ်ပျက်စီးသွားရတဲ့သူတို့(၂)ယောက် အတွက်တကယ်ပဲ စိတ်မကောင်းခဲ့ပါဘူး။
Ronney Zar လည်းယူပစ်လိုက်သလို ရုပ်ကကျသွားပါတော့တယ်၊ အကြောင်းသိ သူငယ်ချင်းတွေကစကြ
နောက်ကြ ပေမယ့်သူကတော့ မရီနိုင်တော့ပါဘူး၊ ကျလာတဲ့မျက်ရည်တွေကို မျက်မှန်အောက်ကနေသုတ်ရင်းနဲ့ မစကြပါနဲ့ကွာလို့ပြောရှာပါတယ်။ (သူက အဲဒီ မျက်ရည်ကျတာကို ငိုတာမဟုတ်ဘူးလို့ပြောပါတယ်၊ ကျနော်တို့ကသူရှက်လို့ညာပြောတာထင်ပေမယ့်၊ အခုမှ သဘောပေါက်မိတာက အဲဒါမျက်ရည်မဟုတ်ဘူး အသဲကွဲလို့ကျလာတဲ့ နှလုံးသားရဲ့သွေးတွေ လျှံတက်ပြီး မျက်လုံးအိမ်ကတဆင့်ထွက်လာတယ်ဆိုတာကိုပါ၊ လူတစ်ယောက်မှာ တစ်သက်မှာ တစ်ခါတည်း၊ တစ်ကြိမ်တည်း ကြုံရတတ်ပါတယ်)
Ronney Zar တစ်ယောက်တကယ်ပဲအသဲကွဲခဲ့ရပါတယ်။ ဘာနဲ့မှ အစားမထိုးဘဲ အချိန်နဲ့ကုစားခဲ့လို့ လူဖြစ် မရှုံးခဲ့ဘူးဆိုကြပါတော့ ခင်ဗျာ။
ကျနော့်လို NO ဆိုတဲ့အဖြေတစ်ခုကိုတောင်ရင်မဆိုင်ရဲတဲ့သူအတွက်၊ Ronney Zar ကိုကြည့်ပြီး သနားတာ၊ ကိုယ်ချင်းစာတာထက် အများကြီးချီးကျူးလေးစားခဲ့ရပါတယ်၊ အချစ်ကြောင့် ဖြစ်ခဲ့ရတဲ့ အသဲကွဲဝေဒနာကို အချစ်သစ်၊ အရက်၊ ဘီယာ အစရှိသဖြင့် တခုခုနဲ့အစားမထိုးပဲ တည်တည်ငြိမ်ငြိမ်ရင်ဆိုင်ဖြတ်သန်းခဲ့တဲ့ သူ့အတွက် မည်မျှ ဦးညွတ်ဖွယ်၊ လေးစားချီးကျူးဖွယ်ကောင်းလိုက်ပါသလဲ။
ကျနော့်အဖြစ်ဘက်တစ်ခါလှည့်ရအောင်၊ ကျနော့်နဲ့ သူမကလည်းဘာမှမဟုတ်တဲ့အနေအထားနဲ့ ဘယ်လောက် ကြာမယ်ဆိုတာ ဘာမှမသိနိုင်တဲ့ဘ၀မှာ ကျနော်ရှိနေခဲ့ရပါတယ်။ တခါတလေ စဉ်းစားမိခဲ့တယ်၊ မရေရာတဲ့ အနေအထားကနေရုန်းထွက်လိုက်ပြီး၊ တခြားတစ်ယောက်နဲ့ အချိန်တွေကိုကြည်ကြည်နူးနူးကုန်ဆုံးလိုက်ရရင် ကောင်းမယ်လို့၊ ဒါပေမယ့် ဘယ်တော့မှ ကျနော့်ရင်ထဲက သူမကိုမှေးမှိန်အောင် ကျနော်ကိုယ်တိုင်မလုပ်နိုင်ခဲ့ ပါဘူး။
အဲဒီ အချိန်မှာ Ronney Zar ကိုကြည့်ပြီး အချစ်ရဲ့သူရဲကောင်းဆိုတာ ဒီလောကမှာတကယ်ရှိတာပဲ၊ ငါလည်း ဘာမှတွေဝေစရာမလိုဘူး၊ လို့ဆုံးဖြတ်ချက်ချပြီး ကျနော်ရဲ့ ချစ်ခြင်းတရားတွေကို မယိုင်းမယိုင်အောင်စောင့်ထိန်း ရင်း ရှေ့ကိုဆက်လက်ချီတက်ခဲ့ပါတယ်။ ရူးတယ်ပဲပြောပြော၊ တစ်ဇောက်ကမ်းသမားလို့ပဲ ဆိုဆို ကျနော်ကတော့ တစ်ယောက်ထဲကိုပဲ မမှိတ်မသုန် ဆက်ချစ်ခဲ့မိပါတယ်၊ ကျနော့်မှာ မျှော်လင့်ချက်မရှိခဲ့ပါဘူး၊ အိပ်မက်တောင်ရဲရဲ မမက်ရဲခဲ့တဲ့ဘ၀ရဲ့ကာလတွေကို ဖြတ်သန်းခဲ့ပါတယ်။
ကျေးဇူးတင်ပါသည် Ronney Zar။ ချစ်ခြင်းတရားအတွက် အသဲကွဲတာကို အရင်းခံပြီး ကျနော်တို့ကိုပညာပေးခဲ့ တဲ့အတွက် ကျနော့်စိတ်ဓါတ်တွေတည့်မတ်မှန်ကန်ခဲ့ပါတယ်၊ ရင်ထဲမှာ တစ်ယောက်ထဲချစ်ခဲ့ရတဲ့(၈)နှစ်လွန်ခဲ့ချိန် မှာ ကျနော်ရဲ့သူမက ``ရှင့်ကို ချစ်မိသွားတာကြာပါပြီ´´ ဆိုပြီး ချစ်စကားစစ်စစ်လေးရသွားခဲ့ရပါတယ်။
ဒီနှစ်ဟာ ကျနော့်အတွက် တစ်ယောက်ထဲချစ်ခဲ့ရတဲ့(၁၀)နှစ်၊ နှစ်ယောက်တွဲချစ်ခဲ့ရတဲ့(၂)နှစ်ပြည့် တဲ့နှစ်လေးပါ……………
ကျနော့်စိတ်ဓါတ်တွေ တည့်မတ်မှန်ကန်အောင် ကိုယ်တွေ့နမူနာပြခဲ့တဲ့ မတွေ့တာကြာလှပြီဖြစ်သော ဆရာ/သူငယ်ချင်း/ညီလေး Ronney Zar ကို အစအနောက်လေးနဲ့နှုတ်ခွန်းဆက်လိုက်ချိန်မှာတော့ ``လာမနောက်နေပါနဲ့ဗျာ၊ နောက်ထပ်ကောင်မလေးတစ်ယောက်က မနေ့ကအသဲခွဲသွားပြန်ပြီဗျ´´တဲ့ဗျာ……………….။ ။
(ဆက်လက်ခွင့်ပြုပါက၊ တားမည့်သူမရှိပါက ``ပြိုင်ဖက်များနဲ့ ချစ်တဲ့သူ´´ ``ရိုးရိုးလေးပဲနှုတ်ဆက်ခဲ့ပါတယ်´´ ``ရန်ကုန်သူမမကြောင့် တောင်ပေါ်ပြန်မရခဲ့သူ´´ Post များဆက်တင်ပေးပါမည်ခင်ဗျာ)
0 comments: