Labels

လူပီသမှု

ဒီကမ္ဘာမြေလောကမှာ ဘယ်အရာဟာ အရေးအကြီးဆုံးဆိုတာ လူသားစိတ် ပီသတဲ့ လူတစုက သက်သေပြလိုက်တာကို ကျနော် မြင်တွေ့ခဲ့ရပါတယ်။ တချို့သော လူတွေက ချမ်းသာပိုင်ဆိုင်မှုကို အရေးပေး သာယာတတ်ကြသလို တချို့ကတော့ သူတို့ရဲ့ တကိုယ်ကောင်း စိတ်ခံစားချက်တွေကို ဦးစားပေး လုပ်ဆောင်တာကို တွေ့မြင်ရတတ်ပါတယ်။ ပြီးခဲ့တဲ့ သြဂုတ်လ ၅ ရက်နေ့ကတည်းက မြေအောက် ၂၂၇၅ ပေကျော် (မီတာ ၆၀၀ ကျော်) မိုင်းတွင်း အတွင်း ပိတ်မိနေခဲ့သော ချီလီသတ္တုတွင်း လုပ်သားများ (၃၃) ယောက်ကို လူသားဆန်စွာ ကယ်တင်နိုင်ခဲ့ပါတယ်။

သာမာန်လူတယောက် အနေနဲ့ စဉ်းစားမယ်ဆို ဒါဟာ အလုပ်သမား ဒုက္ခရောက်နေတာကို သူဌေး(ပိုင်ရှင်)က ပြန်ကယ်ရတာဟာ ထုံးစံတခုပါပဲ။ ဒါပေမဲ့ ဒီလူသား ၃၃ ယောက်ကို ကယ်တင်ရာမှာပညာရှင်တွေသာမက နိုင်ငံခေါင်းဆောင်တွေကပါ လူသားချင်း လေးစားမှုကို ပြသခဲ့ကြပါတယ်။ အတော်ကို လေးစား အားကျဖွယ် ကောင်းလှပါတယ်။ ဒီကယ်တင်မှုကို Live အနေနဲ့ ကြည့်နေတဲ့ ကျနော်တောင် ရင်ထဲမှာ မပြောပြတတ်အောင် ကြည်နူးမှုလေးတွေ ဖြစ်ပေါ်နေမိတယ်ဆိုတော့ ၂လကျော် ဝေးကွာနေရတဲ့ မိုင်းလုပ်သားတွေရဲ့ မိသားစု၊ မိုင်းလုပ်သားတွေရဲ့ စိတ်ဓါတ်ကို ပိုလို့တောင် ကိုယ်ချင်းစာ ခံစားမိပါတယ်။ ကယ်ဆယ်စဉ် အတွင်း နောက်ဆုံး တက်လာတဲ့ မိုင်းလုပ်သမားက အဖွဲ့ရဲ့ ခေါင်းဆောင်ဖြစ်ပါတယ်။ ခေါင်းဆောင်တယောက်ရဲ့ လုပ်ဆောင်ချက်တွေကလဲ အတုယူစရာ ကောင်းလှပါတယ်။

[youtube]http://www.youtube.com/watch?v=XGecqHnN2gQ[/youtube]

ဒီလူသားဆန်တဲ့ ကယ်ဆယ်မှုတွေကို ကျနော်ကြည့်ပြီး ကိုယ့်တိုင်းပြည်ကို အစားထိုး ခံစားကြည့်နေမိတယ်။ တကယ်၍ ကျနော်တို့ တိုင်းပြည်မှာ ဒီလို ဖြစ်နေခဲ့ရင်ကော ကျနော်တို့ တိုင်းပြည်ရဲ့ တာဝန်ရှိသူတွေက ဒီလို လုပ်ဆောင်ပါ့မလားလို့...... တွေးရင်း တွေးရင်းနဲ့ ဟိုတချိန် နာဂစ်ရဲ့ ရိုက်ခတ်မှုအောက်က မိသားစုတွေ၊ ကလေးငယ်တွေရဲ့ ပုံရိပ်တွေကို ပြန်မြင်ယောင်ရင်း...........

လူသားတိုင်း လွတ်လပ်စွာ ဝေဖန်နိုင်ခွင့်ရှိပါသည်။

……….

လေးစားလျက်

တောင်ပေါ်သား

အရင်တုန်းက

တခါတလေတော့လဲ ကျနော် တွေးနေမိသား..... ဘာရယ်တော့လဲ မဟုတ် ပျင်းနေရင် တွေးနေမိတာ လူတွေရဲ့ အကျင့်တခုမလား.. ဒီတော့လဲ ကျနော် တွေးမိတယ် (ဆိုလိုချင်တာက အပျင်းကြီးနေတယ်) ကျနော်တို့လို လူတွေအနေနဲ့ ခင်မင်စရာ တွယ်တာစရာလေးတွေကို ခုံမင်တတ်ကြတာပဲ။ မိသားစုနဲ့ ဝေးနေရတော့လဲ တခါတလေ မိသားစုကိုလွမ်းမိကြတယ်။ မိဘ၊ဆွေမျိုးတွေကို လွမ်းတတ်ကြမယ်..... သူငယ်ချင်း အပေါင်းအသင်းတွေကို သတိရတတ်ကြမယ်.... ကျနော်တို့တွေ ဒီလို အချိန်တွေ အများကြီး ပေးဆပ်ခဲ့ရတာတွေ ထိုက်တန်တဲ့ ရလာဒ်တွေကော ရခဲ့ကြသလား....... သေချာစဉ်းစားကြည့်မိတော့ ကျနော်သည် အရင်တုန်းက ကျနော် မဟုတ်ခဲ့တော့ပေ.......

အရင်တုန်းက ပိုးသားလို ဖြူတဲ့ အမေ့လက်ပေါ်မှာ ကျနော် ကြီးပြင်းလာခဲ့တယ်... ခုတော့ ကျနော် ပိုးသားလို လိုက် မဖြူနိုင်တော့ပေ.....

အရင်တုန်းက ကျနော် သူငယ်ချင်းတွေကို တွယ်တာတတ်တယ်... ခုတော့ ကျနော် သူငယ်ချင်းတွေကို မေ့နေတတ်ပြီ........

အရင်တုန်းက ကျနော် မိသားစုကို ခင်တွယ် မြတ်နိုးတယ်... ခုတော့ ကျနော် တယောက်ထဲ နေတတ်ခဲ့ပြီ.........

အရင်တုန်းက အထိုက်အလျောက် ဖြူစင်ခဲ့ဖူးတယ်... ခုတော့ ကျနော် အစွန်းအထင်းတွေ များခဲ့ပြီ...........

အရင်တုန်းက ကျနော် ရိုးသားခဲ့ဖူးတယ်....... ခုတော့ ကျနော် လိမ်တတ်ခဲ့ပြီ............

အရင်တုန်းက ကျနော် ပွင့်လင်းစွာ ပြောဆိုဖူးခဲ့သည်...... ခုကျနော် ပါးစပ်တွေ နှုတ်ဆိတ်နေတတ်ခဲ့ပြီ……..

အရင်တုန်းက အမှားတွေ နဲခဲ့တယ်…… ခုတော့ ကျနော် အမှားများနဲ့ လူတယောက် ဖြစ်နေပြီ……..

အရင်တုန်းက အမှားသိရင် ရှောင်ခဲ့ဖူးတယ်…. ခုတော့ ကျနော် အမှားကို သိရက်နဲ့ ထပ်တိုးနေမိပြီ…..

ခုနေများ အရင်တုန်းက မိတ်ဆွေ၊ သူငယ်ချင်းတွေ များတွေ့ရင် သူတို့ ရင်ထဲက ထွက်လာမဲ့ စကားလေး တခုကို ကျနော် ကြိုခန့်မှန်းတတ်ခဲ့ပါပြီ။

သြော်…. ကျနော်သည် အရင်တုန်းက ကျနော် မဟုတ်တော့ပါ့လား……………………….

လူသားတိုင်း လွတ်လပ်စွာ ဝေဖန်နိုင်ခွင့်ရှိပါသည်။

..........

လေးစားလျက်

တောင်ပေါ်သား

မိတ်ဆွေ

မိတ်ဆွေ၊ အပေါင်းအသင်း စတာတွေက လူတယောက်ရဲ့ ဘဝမှာ ဘယ်လောက်ထိ အရေးပါနိုင်ပါသလဲ .. ဘယ်အတိုင်းအတာတခုထိ ဖြည့်ဆည်းပေးနိုင်ပါမည်လဲ။ လူရယ်လို့ ဖြစ်လာပြီဆိုကတည်းက ပတ်ဝန်းကျင် အသိုင်းအဝန်းကြားမှာ ကြီးပြင်း ပေါက်ဖွားလာခဲ့ရတာတွေချည်း မဟုတ်ပါသလား။ ဒီတော့ ကျနော်တို့ အတွက် ပတ်ဝန်းကျင် အသိုင်းအဝိုင်းဆိုသည်မှာ ကင်းကွာလို့မရ .. ဒါတွေကို မျက်စိစုံမှိတ်ပြီး လူ့လောကမှာ တယောက်ထဲ ရပ်တည်နေနိုင်ဖို့ ဆိုတာကကော ဖြစ်နိုင်ပါမည်လား။ ကျနော်တို့ရဲ့ မိသားစု အသိုင်းအဝန်း ဆိုသည်မှာ လောကကြီးအတွင်း လူသားချင်း ဘယ်လို ဆက်ဆံ ပြုမူနေထိုင်ရမယ်ဆိုတာတွေကို သင်ကြားပေးခဲ့တဲ့ လက်ဦးဆရာတွေသာ)

သတ္တဝါ (လူ၊တိရစ္ဆာန်) လို့ ဆိုလိုက်တာနဲ့ သူတို့ ကျင်လည်နေထိုင်တဲ့ ပတ်ဝန်းကျင်ပေါ်မှာ မူတည်ပြီး အကောင်း၊ အဆိုးရှိသည်။ အယဉ် အရိုင်း ရှိသည်။ ဥာဏ်ရည်မြင့်တဲ့ တိရစ္ဆာန်လိုမျိုး ရှိသလို ကျနော်တို့ လူသားတွေထဲမှာလဲ ဥာဏ်ရည်မြင့်သည့် လူတွေ ရှိသလို၊ ဥာဏ်ရည် မမြင့်တဲ့ လူသတ္တဝါ လူအန္ဓ တွေလဲ တပုံတပင် ရှိနေပေလိမ့်မည်။ အခြေခံ အကျဆုံး အချက်ကတော့ ဘယ်လောက်ပဲ ဥာဏ်ရည်၊ ဥာဏ်သွေး မြင့်မားနေပါစေ၊ နိမ့်ကျနေပါစေ ကျနော်တို့တွင် မိတ်ဆွေ သူငယ်ချင်း အပေါင်းအသင်းကတော့ ရှိရစမြဲပင်။ ကျနော်တို့ ဘာသာတရားတိုင်းလိုလိုတွင် ရှိနေသည့် အချက်က လူလောကဆိုသည်မှာ တကယ်တော့ ခဏတာအချိန်လေး တခုအတွင်းသာ ဖြစ်သည်မဟုတ်ပါလော့။ ဤခဏတာ လူဖြစ်ရသည့်အချိန်လေးထဲမှာ ကျနော်တို့ အချင်းချင်း ချစ်ခင်ညီညွတ်စွာ နေထိုင်ကြရင်ဖြင့် ကျနော်တို့ စိတ်ကျေနပ် ပျော်ရွှင်မှုတွေနဲ့ ပျော်ရွှင်စရာ အရသာကို ခံစားရပေမည်။ အကြောင်းကြောင်းကြောင့် ကျနော်တို့ လမ်းခွဲခဲ့လျှင်လဲ စိတ်ဖြူစင် သန့်ရှင်းစွာဖြင့် ပျော်ရွှင်စွာ နှုတ်ဆက်လမ်းခွဲတတ်ဖို့က အရေးကြီးပေသည်။ တဦးနှင့် တဦး စတင် တွေ့ဆုံခင်မင်ရခြင်းသည် တနေ့ခွဲရဖို့ပင်။ ဒီအချက်သည် သေချာသော လောကနိယာမ တခုဟု ကျနော် ယူဆမိပါသည်။

ကျနော်သည် လူတယောက် ဖြစ်သည့်အလျှောက် လူတယောက်မှာ ရှိသင့်သည့် စိတ်ခံစားချက် ရှိပေသည်။ တခါတရံ ကျနော် စိတ်တိုတတ်သည်၊ ကျနော် မရင့်ကျက်သည့် အရာတွေလဲ အများအပြားပင်ဖြစ်သည်။ ဟိုငယ်စဉ်တုန်းကဆို ကျနော်တို့ သူငယ်ချင်းတွေ ကစားစဉ် အချင်းချင်း စကားနိုင်လုပြီး ရန်ဖြစ်တတ်ကြသည်။ ပြီးလျှင် ကျနော်တို့ စကားမပြောကြတော့ ဒါပေမဲ့ ဒါတွေသည် အချိန်အများကြီးမဟုတ် ကျနော်တို့ သူငယ်ချင်းတွေ စကားမပြောလျှင် အလွန်ဆုံး တပတ်ပေါ့ ပြီးလျှင် တူတူကစား ပျော်ပါးပြီး အငြိုးအတေး ကင်းကင်းနှင့် လက်တွဲတွေ မဖြုတ်ပဲ တွဲလက်တွေ ညီခဲ့ကြသည်သာ။ ထိုစဉ် ကလေးဘဝက ရန်ဖြစ်ရခြင်းအကြောင်းများက မိမိက သူများထက် သာချင်၍ ဖြစ်စေ၊ မိမိကို သူများက ပို၍ ဦးစားပေးခံချင်၍ ဖြစ်သည်က များသည်။ ဒါပေမဲ့ ကလေးဘဝက အရာရာသည် အဖြူထည် သက်သက်သာ။ ကျနော်တို့တွင် အငြိုးအတေး အာဃာတဆိုတာ မရှိခဲ့။ အရိုးခံ ဖြူစင်ခဲ့ကြသည်သာ ဖြစ်သည်။

အရွယ်ရောက်လာတော့ ကျနော်တို့ စိတ်တွေ ပြောင်းလဲတတ်ခဲ့သည်။ ပတ်ဝန်းကျင်ကို လိုက်၍ အမူအကျင့်တွေ ပြောင်းလဲတတ်ခဲ့သည်။ (ကျေးညီနောင် ပုံပြင်လိုပေါ့။) ကြီးပြင်းရာ ပတ်ဝန်းကျင်ကို လိုက်၍ ဖြူစင်ရိုးသားခဲ့သော စိတ်တို့သည် အရောင်မျိုးစုံ စွန်းထင်းခဲ့သည်။ ကျနော်တို့ စိတ်အလိုကို လိုက်ပြီး မှားယွင်းခဲ့ကြဖူးသည်။ အတွင်းစိတ် အေးချမ်းဖို့ထက် အပေါ်ယံ သာယာမှုတွေအပေါ်ကို ပိုမိုခုံမင်ခဲ့ကြသည်။ အပေါင်းအသင်းတွေ ပေါင်းစုံ ပေါင်းတတ်ခဲ့ကြသည်။ အပြုသဘောဆောင်ပြီး ကျနော်တို့ ခင်မင်ခဲ့ကြသည်။ အကြောင်းကြောင်းကြောင့် ကျနော်တို့ လမ်းခွဲခဲ့ရသော် ကျနော်တို့ ငယ်စဉ်ကလေးဘဝကလို စိတ်တွေ ဖြစ်ပေါ်လာခဲ့ရပြန်သည်။ ဒါပေမဲ့ ကျနော်တို့ မဖြူစင်ခဲ့ကြတော့ ကျနော်တို့ ရင်ထဲမှာ မဖော်ပြနိုင်တဲ့ မီးတောက်ကလေးတွေ လောင်ကျွမ်းခဲ့ရလေပြီ။ သေချာပြန်စဉ်းစားကြည့်ရင် ဆုံးရှုံးခဲ့ရသော အဖြစ်အတွက် ဘယ်လောက် ဝမ်းနည်းစရာကောင်းလိုက်ပါသလဲ။ ကျနော်တို့ ဆုံးရှုံးခြင်းသည် တခု မကခဲ့ပေ .. သူငယ်ချင်း ချစ်ခြင်းတရားများ ယုံကြည်မှုများ ပျော်ရွှင်မှုများ ကုန်လွန်ခဲ့သော အချိန်များ .. များစွာပင် ..

အသက်ရှင်နေသရွေ့ မလွဲမသွေ ဆုံတွေ့ခြင်း ကွဲကွာခြင်းပေါင်းများစွာ ဆုံတွေ့နည်း ကွဲကွာနည်းမျိုးပေါင်းစုံနှင့် မျက်နှာချင်းဆိုင် ဆုံတွေ့ရလိမ့်ဦးမည် .. ထိုအတွက် ကျနော်တို့ တုန်လှုပ်ကြမည်လား .. အေးအေးသက်သာ ကြည်ကြည်သာသာနှင့် အပြုံးများနဲ့ ပျော်ရွှင်စွာ လက်ပြနှုတ်ဆက်ကြမည်လား ..

လူသားအားလုံးသည် ပျော်ရွှင်စွာဖြင့်နဲ့ လမ်းခွဲခြင်းကို ပိုမိုမြတ်နိုးမည် မျှော်လင့်သည် .. အသင်ဆိုလျှင်ကော..........

.........

..........................

လူသားတိုင်း လွတ်လပ်စွာ ဝေဖန်နိုင်ခွင့် ရှိသည်။

လေးစားလျက်

တောင်ပေါ်သား

ကျနော် ငပျင်း

ခုတလော အလုပ်တွေကများပြီး ပိုစ့်တွေတောင် မရေးဖြစ်တာကြာပါပြီ။ ပြောတဲ့လူများလာလို့ ကိုယ့် site လေးကို ဖုန်ခါတယ် ပြောပြော စိတ်ကူးတဲ့ရာ လုပ်တယ်ပဲ ပြောပြော တင်ချင်တာ တင်လိုက်ပါတယ်။ ခုတလော အလုပ်ကလေးကလဲ သိပ်အဆင်မပြေချင်တော့ အလုပ်ကို အကြောင်းပြလို့ စာမရေးဖြစ်တာ ကြာပါပြီ။ တကယ်ကတော့ အပျင်းကြီးနေတာပါ။ အပျင်းက ဘယ်လောက်ကြီးသလဲဆို ခုရက်ပိုင်း ခွင့်ယူတဲ့ ရက်တွေများနေတာ ကိုယ်တိုင်ပဲ သိတယ်။ အရင်တုန်းက ယူလို့ မရခဲ့တဲ့ ရက်တွေ တဝကြီး အစားထိုးယူနေတာပါ။ တနေ့တနေ့ ယူထားတဲ့ ရက်တွေ ဘာလုပ်မိသလဲ အားနေရင် Movies တွေကြည့်သည်။ Game ကစားသည်။ Facebook ဆိုတာဝင်သည်။ ကျောင်းကလဲ ၂ ပတ် ပိတ်ထားပေးပါသည်။ ဒီတော့ ကျောင်းသား လုပ်နေပေမဲ့ ကျောင်းစာ လေ့လာဖြစ်သလားဆိုတော့လဲ မလေ့လာဖြစ်ပါ။ ကျနော် အပျင်း ကြီးနေသည်။

တခါတလေတော့လဲ စဉ်းစားမိတယ်။ လူ့လောကကြီးမှာ အရာရာ ပြည့်စုံနေရင်လဲ မကောင်းဘူး၊ အရာရာ ချို့ယွင်းနေရင်းလဲ မကောင်းဘူးလို့။ ချို့တဲ့ခြင်းကို အဓိက ပြောချင်တာက လူတယောက်ရဲ့ အပြင်ပန်းထက် အတွင်းစိတ်တွေကိုပါ။ အရာရာကို ငါ တလုံးပဲ ကိုင်စွဲတော့လဲ မှန်နေတာတွေတောင် မှားနေတယ်လို့ အမြင်တွေက ရောက်သွားတတ်တာကိုး။ ချစ်ရသူက ပြောတယ် ဘုရားသခင်က ဘာလို့ ကောင်းတာတွေပဲ မပေးတာတုန်းတဲ့။ တကယ်လို့ ဆုတောင်းတိုင်းတာ ကျနော်တို့ကို ဘုရားသခင်က ပြည့်စုံအောင် ပေးနေမယ်ဆိုရင် ကျနော်တို့လို လူမိုက်တွေ ဘုရားသခင်ကိုမေ့လျှော့လို့ နေတော့မှာပေါ့။ လုံ့လ ၊ ဝီရိယ မပါပဲ ဘယ်အရာမှ မအောင်မြင်တတ်ပါဘူး။ ဘယ်အရာမဆို ပြုသူ၊ အပြုခံသူ၊ အကျိုးနဲ့အကြောင်း ရှိစမြဲပါပဲ။ ခုလို အချိန်မျိုးမှာ ကိုယ့်ဟာကိုယ် တွေးနေမိတယ်။ ဟိုအရင် ဒီရောက်တုန်းကလို စိတ်တွေလဲ တဖြည်းဖြည်းလုံးပါး ပါးလာခဲ့ပါလားလို့ပေါ့။ အရင်လို ကြိုးစားချင်စိတ်တွေ ပျောက်နေတယ်။  မနက်စောစော ထရမှာ အပျင်းကြီးနေတယ်။ တိုးတက်နေတဲ့ တိုင်းပြည်ကြီးမှာ အမီလိုက်နိုင်အောင် ကြိုးစားချင်ရင်တော့ လူတိုင်းနဲ့ တန်းတူ လိုက်လုပ်ရမှာပါပဲ။ ဒါပေမဲ့ ကျနော် အပျင်းကြီးနေတယ်။

လက်ရှိ ကမ္ဘာဖလား ဘောလုံးပွဲတွေကလဲ လာနေတော့ ည ညဆို မအိပ်ဖြစ်ဘူး။ အခုတောင် မနက်ဖြန် ခွင့်ယူထားတယ်။ ညဥ့်နက် လာမဲ့ ဘောလုံးပွဲကြည့်ဖို့ စောင့်ရင်း ပျင်းနေတာနဲ့ စိတ်ကူးထဲ ရှိတာတွေ ကျနော် ရေးနေမိတာပါ။ အဲ့လို အပျင်းကြီးနေတာပါ။ တခါတလေတော့လဲ စိတ်ကူးတိုင်း ဖြစ်တာမှ မဟုတ်တာ။ ဟုတ်တယ်မလား ဒီတော့ ဖြစ်တဲ့ အတိုင်းလေး မျောလိုက်သွားနေမိတာ ခုတော့ အပျင်းရောဂါပါ စွဲကပ်နေပါပြီ။ ဘယ်အရာမဆို လိုချင်ရင်တော့ အချိန် ဒါမှမဟုတ် တခုခုကို မဖြစ်မနေ စတေးခံရမှာပဲလေ။ ဘဝမှာ စိတ်ဓါတ်တွေ ကျခဲ့ဖူးပါတယ်။ ဒါပေမဲ့ အရာရာဟာ ကိုယ်လုပ်ရင် ဖြစ်လာမှာပဲ မဟုတ်လား ဒီတော့ ခုမဖြစ်ရင်တောင် တချိန်တော့ ဖြစ်လာမှာပဲ ဆိုတဲ့ စိတ်နဲ့ ကြိုးစားကြည့်လိုက်ရင် မဖြစ်ဘူးဆိုတာ မရှိပါဘူး။ မြန်မာစကားလေး ရှိတယ်မလား ကြိုးစားရင်း ဘုရားတောင် ဖြစ်နိုင်သေးတာပဲ။ စိတ်ကလေး နဲနဲထည့်ပြီး ကျနော်လုပ်ကြည့်ရင် ဖြစ်နိုင်ပါတယ်။ ဒါပေမဲ့ ကျနော် အပျင်းကြီးနေတယ်။

လူ့လောကမှာ တယောက်ထဲ ရုန်းကန်ဖို့ဆိုတာ အတော်ကို လွယ်ကူပါတယ်။ နေစရာ ၊ စားစရာလေးနဲနဲ ရှိရင် နေတတ်မယ်ဆိုရင် တယောက်ထဲ နေလို့ရပါတယ်။ ဒါပေမဲ့ ကျနော်တို့ရဲ့ နောက်မှာ မမြင်ရတဲ့ အရာပေါင်းများစွာ လွှမ်းခြုံထားတတ်ကြပါတယ်။ အချို့က မိသားစုဘဝ၊ တချို့က အိမ်ထောင်သည် ဘဝ။ သားသမီး ရတနာတွေကို ကျနော်တို့ ဘယ်လို ပြုစုပျိုးထောင်မှာလဲ။ ကျနော် ဒီမလာခင်တုန်းက ဦးလေးက စကားလေး တခွန်းမှာလိုက်ပါတယ်။

[stextbox id="grey"]ဘဝတခုကို တည်ဆောက်တော့မယ် ဒါမှမဟုတ် ကိုယ့်ဘဝကို ကိုယ်တိုင် ကြိုးစား ဖြတ်သန်းတော့မယ်ဆိုရင် ကိုယ့်ဘဝ တခုထဲကို မကြည့်နဲ့တဲ့၊ ကိုယ့်ရဲ့ နောက်မှာ ရပ်တည်နေတဲ့၊ ဖြစ်တည်လာမဲ့ အသက်ပေါင်းများစွာ ရှိနေတယ်တဲ့။[/stextbox]

သူတို့အတွက်ဆိုပြီး ကျနော်တို့ ရည်မှန်းကြိုးစားရင် အောင်မြင်မှုဆိုတာ မကြာပါဘူး ရရှိလာမှာပါပဲ။ ခုတလော ဦးလေး စကားလေးတွေ ပြန်ကြားယောင်နေမိတယ်။ ဟုတ်တယ် ကျနော် တယောက်ထဲ ကိုယ့်ဘဝတခုထဲ ကိုယ်ကြည့်နေမယ်ဆို လိုအပ်တာတွေထက် ပိုနေတာကများနေပြီ။ ဒါပေမဲ့ နောင် ဖြစ်လာမဲ့ မျိုးဆက်၊ သားသမီးတွေအတွက် ပြန်တွေးကြည့်လိုက်တော့ ကျနော် လုပ်နိုင်ခဲ့တာ ဘာရှိလို့တုန်း။ ကျနော်  ကြိုးစားဖို့ လိုနေပါသေးတယ်။ ကျနော် အစွမ်းအစတွေ ရှိနေပါသေးတယ်။ ဒါပေမဲ့ ကျနော် ပျင်းနေသည်။ တခုခု လုပ်တော့မယ်ဆို မဖြစ်နိုင်ဘူးဆိုပြီး ကျနော် တွေးတတ်နေပြီ။ တကယ့်ကို  ကျနော် အသုံးမကျတဲ့ လူတယောက်လို ဖြစ်နေတော့သည်။ ကျနော် ပျင်းနေပါသည်။

ဘာပဲ ပြောပြော ကျနော် အပျင်းကြီးနေတာတွေကို ကျနော် ကိုယ့်ဘာသာကိုယ် နှစ်သိမ့်နေမိတာပါ။ ဒါမှလဲ ကျနော် ပျင်းနေတာ လူတွေသိလို့ ကျနော် ရှက်တတ်လာမှာပေါ့။ ကျနော်လိုပဲ စာဖတ်သူတွေလဲ အပျင်းကြီးနေမယ်ဆို ခု ပြင်လိုက်ကြရင် မကောင်းဘူးလားဗျာ..... တကယ်တော့ အပျင်းကြီးတယ်ဆိုတာ ရှက်စရာ အလွန်ကောင်းဆိုပဲဗျ အပျင်းကြီးသူများ အဖွဲ့ကတော့ [stextbox id="info"]အပျင်းကြီးတယ်ဆိုတာ နာမည်သာ ဆိုးတာတဲ့ လူသက်သာတယ်[/stextbox] ဆိုပဲ။ ခုတော့ ကျနော် လူမသက်သာတဲ့ အပြင် အိပ်နေလိုက်တာ နေ့၊ညတွေ လွဲလို့ အလုပ်လဲ မသွားနိုင်ပါဘူးဗျာ၊ လူက မနက်စောစော မထတော့ ခေါင်းတွေလဲ ကိုက်၊ အုံမှိုင်းပြီး အပျင်းတွေကတက်လိုက်နဲ့ တကယ့်ကိုပါပဲ ကျနော် တကယ် အပျင်းကြီးနေပါသည်။

လူသားတိုင်း လွတ်လပ်စွာ ငြင်းဆိုခွင့်၊ ပြောဆိုခွင့် ရှိပါသည်။

လေးစားလျက်

တောင်ပေါ်သား


လူ့စိတ်


ပညာတွေတတ် အမိုက်မှောင်ဖုံး
ပြင်ရန်ခက်ခဲ မိုက်တွင်းနက်သည်


တဇောက်ကန်းမြင် ငါလုပ်ငါမှန်
လွှဲမှားယူဆ ပြင်ရန်ခက်သည်


တိုင်းပြည်မချစ် မစောင့်ထိန်းတော့
သူ့ကျွန်ဘဝ အမြန်ရောက်သည်


အရှက်မရှိ အကုန်ဖော်ထုတ်
-ွားဇာတ်ခင်းတော့ လူကြည့်များသည်


နှုတ်လျှာကြမ်းတမ်း အပြောမောက်မာ
မိဘဂုဏ်ကို ဖော်ထုတ်ပြသည်


ဟိုအရင် Blogspot မှာတုန်းက တင်ထားဖူးတဲ့ ကဗျာလေး တခုပါပဲ။ တချို့တွေလဲ ဖတ်ပြီးသား ဖြစ်နေပြီးလောက်ပါပြီ။ ခု ထပ်ထည့်ချင်တာလေး ရှိလာလို့ ထပ်ဖြည့်ကြည့်ပါတယ်။း)

လူသားတိုင်း လွတ်လပ်စွာ ဝေဖန်ပြောဆိုနိုင်ခွင့်၊ ငြင်းဆိုနိုင်ခွင့် ရှိပါသည်။

လေးစားလျက်


တောင်ပေါ်သား

ကျနော် ကျောင်းဆရာ (၆)

စာဖတ်သူ ဒီစာကို အသင်ဖတ်မယ်ဆိုလျှင် သင့်အတွက် အကျိုးမရှိနိုင်ဘူးလို့ သင်ယူဆလို့ ရပါတယ်။ တကယ်တော့ ဒီစာကလဲ သင့်အတွက် ဟုတ်ချင်မှ ဟုတ်မှာပါ။ ကျနော်ရဲ့ စိတ်အချဉ်ပေါက်မှုတွေကိုသာ ဖော်ပြထားတာပါ။ အသင့်အနေနဲ့ စိတ်မကျေနပ်ရင်၊ အစာမကျေဘူးဆိုရင်တော့ ကျနော့်ရဲ့ Comment သို့မဟုတ် C-Box လို့ ခေါ်တဲ့ နေရာလေးမှာ ကြိုက်တာရေးသွားနိုင်ပါတယ်။

လူသားတိုင်းဟာ ခံယူချက်ခြင်း မတူညီကြပါဘူး။ စိတ်ဓါတ်ကောင်းတာတွေ ရှိသလို စိတ်ဓါတ်မကောင်းတာတွေလဲ ရှိပါတယ်။ ကျနော့် အမြင်ကတော့ စိတ်ဓါတ်ကောင်း၏ မကောင်း၏ ဆိုတာကို ဘာအနေနဲ့ တိုင်းတာသလဲ စဉ်းစားကြည့်တော့ လူမျိုးနဲ့ တိုင်းတာရင် အများစုက အတော်အသင့် မှန်ကန်တာကို တွေ့ရပါတယ်။ ဒါဟာ ကျနော် တယောက်ထဲရဲ့ ခံယူချက်ပါ။ ဥပမာ စင်ကာပူလို့ နိုင်ငံမှာ နိုင်ငံပေါင်းစုံက လူတွေ အလုပ်လာလုပ်ကြပါတယ်။ အင်ဒို၊ ဘင်္ဂလား၊ ထိုင်း၊ မြန်မာ၊ အနောက်ဥရောပ စသည်ဖြင့်ပေါ့.... ဒီမှာ ကျနော်တို့ အများစုကို လူမျိုးနဲ့ တိုင်းတာကြည့်မိတော့ တော်တော်များများကလဲ မှန်ကန်တယ်လို့ ယူဆရပါတယ်။

ဥပမာ အားဖြင့် စကာင်္ပူ နိုင်ငံသား အများစုဟာ သူတို့ကိုယ် သူတို့ စင်ကာပူ နိုင်ငံသား ဖြစ်ရတာ အရမ်း ဂုဏ်ယူတတ်ပါတယ်။ စင်ကာပူ နိုင်ငံသား မဟုတ်တဲ့ လူအချင်းချင်း ဆက်ဆံရမှာ အတော့်ကို ခွဲခြားဆက်ဆံတတ်ပါတယ်။ သူတို့ဟာ သူတို့ အကုန်လုံး တတ်သိနေတယ်လို့ သူတို့ ခံယူထားကြတတ်ပါတယ်။ တကယ်တော့ တွေ့ရသလောက် လေ့လာကြည့်ရင် သူတို့ဟာ သူတို့ရဲ့နယ်ပယ်မှာ ကျွမ်းကျင်မှုတွေ လိုအပ်ချက်တွေ ရှိနေသေးတာကို တွေ့ရပါတယ်။ အားလုံးကို မပြောလိုပါ ဒါပေမဲ့ အများစုကို ပြောတာပါ။

အခြား ဥရောပ နိုင်ငံသားတွေ အနေနဲ့ကတော့ ဒီလို အာရှနိုင်ငံတခုမှာ အေးဆေး မော်ကျော့စွာ အလုပ်လုပ်နေတာကို တွေ့ရပါတယ်။ သူတို့ဟာ တကယ့်ကို ပြည့်စုံသူတွေ အများစုပါ။ ဆိုလိုတာက နယ်ပယ်တခုမှာ အလုပ် လုပ်နေတဲ့ လူတယောက်ဟာ သက်ဆိုင်တဲ့ နယ်ပယ်တွေမှာ အတော့်ကို ကျွမ်းကျင်တာကို တွေ့ရပါတယ်။ အခြားလူမျိုးအများစုကတော့ သိပ်ထူးခြားနားမှုမရှိလှပါဘူး။ ဖိလစ်ပိုင်တွေကတော့ ယောကျာ်းလေးတွေက သဘောထား ရိုးသားတတ်ပြီး မိန်းကလေးတွေကတော့ မိန်းမစိတ်လေးတွေ ရှိတာ တွေ့ရပါတယ်။ ကျနော်တို့ မြန်မာလူမျိုးတွေကော...........

မြန်မာတွေဟာ တကယ်တမ်း စိတ်ထား ဖြူစင်ပါတယ်။ ဒါပေမဲ့ အရှိကို အရှိအတိုင်း မနေတတ် ဟိတ် ဟန်လုပ်တာက ခပ်များများရယ်ပါ။ ပုံပြင်ထဲက "ဒေါင်းယောင်ဆောင်သော ကျီး" လိုပေါ့.... နေရာဒေသတွေ ပြောင်းလာလို့ အလေ့အထတွေ ပြောင်းလာတာကတော့ ဖြစ်တတ်ပါတယ်။ ဒါပေမဲ့ မြန်မာလူမျိုး အများစုဟာ "ဝ" မရှိပဲ "ဝိ" လုပ်ချင်သူတွေပါ။ တစိတ်ကို တအိတ်လုပ်တတ်သူတွေပါ။ ဒါကြောင့်ပဲ ရှေးလူကြီးတွေက စကားပုံတွေ၊ လကာင်္တွေ အများကြီး ထားသွားခဲ့တယ်နဲ့ တူပါရဲ့။

မြန်မာပြည်ကနေ တိုင်းတပါးမှာ တကယ့်ကို ပညာတတ်စွာနဲ့ အလုပ်လာလုပ်သူတွေ တပုံကြီးပါ။ တကယ့်ကို ဂုဏ်ယူ ချီးကျူးစရာပါ။ ဟိုတလောက က ကိုဒီဂိုလာ ဆိုဒ်မှာ တင်ထားတာ ဘယ်လောက် အားကျဂုဏ်ယူစရာကောင်းသလဲ။ ကျနော်ဆိုတဲ့ ကောင်ကတော့ ဘာဆို ဘာမှ ဖြစ်မလာသေးတဲ့ လူအ တယောက်ပဲ ရှိနေပါသေးတယ်။ သူများတွေ အနှစ်နှစ် အလလ ကျက်မှတ်ပြီး ဖြေရတဲ့ ကွန်ပြူတာ စာမေးပွဲတွေ ကျနော်တို့ မြန်မာတွေ တရက် နှစ်ရက်နဲ့ ဖြေပြီး အောင်ပါတယ်။ ဒါကိုပဲ သူတို့ ဂုဏ်ယူလိုက်ကြပါသေးတယ်။ တကယ်တော့ အလွယ်လမ်း လိုက်တာပါ။ စပေါ့ မေးခွန်းတွေ ဖတ် အမေးက ဒါဆို အဖြေက ဒါ ပုံသေဇယားတခုကို ကျက်တာလောက် လွယ်တာ မရှိပါဘူး။ ဒီလို အလွယ်လိုက်ပြီး အောင်မြင်လိုက်ကျတာ Computer စာမေးပွဲတွေ ဖြစ်တဲ့ CCNA,CCNP,MCSE စသည်ဖြင့် ရကုန်လိုက်တာ လက်မှတ်တာရတယ် Account Manage လုပ်တတ်လား No ပါပဲ။ Print Server ထိုင်တတ်လား No ပါပဲ။ ဒီတော့ ဘယ်သူတွေ ဒုက္ခရောက်သလဲ တိုင်းတပါးကို လာတယ် တကယ်မတတ်ပဲ လက်မှတ်လေး ယူလာတယ် အလုပ်ရှာရခက်တယ် ဒါ ဘယ်သူ့ အပြစ်တုန်း.........

ပြီးခဲ့တဲ့ သင်္ကြန် မြန်မာပြည်မှာ ဗုံးကွဲတယ်။ သေတဲ့လူသေတယ် ဒဏ်ရာ ရသူ ရတယ်။ ဒီကိစ္စမှာ လူ ၁၀၀ မှာ ၉၉ ယောက်လောက်က ရှုံ့ချကြတာ အားလုံး အမြင်ပါပဲ။ ၁ ယောက်သော သူကတော့ သူတို့နဲ့ သက်ဆိုင်လို့ ဖြစ်မှာပေါ့။ ကိုညီလင်းဆက် ဓါတ်ပုံ တင်တယ် လူတိုင်း ကော်ပီ လုပ်တယ်။ ဒါကောင်းသော အရာမဟုတ်ပါ။ ဟိုက ဦးဦးဖျားဖျား အသက်နဲ့ ရင်းပြီး ရနိုင်တဲ့ ဓါတ်ပုံတွေကို ကိုယ်တိုင် ရိုက်လာတာ.... အားလုံးက Credit မပေးပဲ လှမ်းတင်တယ်။ သူ့အတွက် စိတ်ဆိုးစရာ ဖြစ်လာတယ် ဒါက သူ့အပိုင်း ဒီတော့ Credit ပေးပေး မပေးပေး သူ့ပုံတွေ မတင်ဖို့ သူကန့်ကွက်တယ်။ ဒါသူ့အလွန်မဟုတ်ပါဘူး ဒါဟာ သတင်းဓါတ်ပုံပါ။ လူမှုရေး၊ ဘာသာရေး စသည်ဖြင့် အများပိုင် မဟုတ်ပါဘူး။

ဘ၀မှာ တဦးတယောက် ဒုက္ခရောက်နေတဲ့ အချိန်မှာ တစုံတခု ကူညီလိုက်ရလို့ ရတဲ့ ပီတိဟာ ဘယ်အရာနဲ့မှ မလဲနိုင်ပါဘူး ပြီးခဲ့တဲ့ ရက်တွေမှာ ကျနော်တို့ မြန်မာပြည်သူ၊သားတွေ ရေဒုက္ခရောက်ကြရတယ်။ ရာသီဥတု ပူပြင်းလာလို့ ရေတွေ ခန်းခြောက်ပြီး သောက်စရာ၊ သုံးရာတွေ မဲ့နေကြတယ်။ ဒါတွေကို သက်ဆိုင်ရာက မကူညီပေးနိုင်တဲ့ အချိန် ကျနော်တို့ ပြည်သူတွေ အားလုံး သူတို့အတွက် မျှဝေခံစားကြတယ်။ ကိုကျော်သူ တို့ ဦးဆောင်ပြီး တာဝန်ယူတယ်၊ မြန်မာဘောလုံး ချစ်သူများ ဆိုဒ်ကလဲ တတ်နိုင်သလောက် လုပ်အားဓါန၊ ငွေအားဓါနတွေနဲ့ လုပ်ဆောင်တယ်။ အဝေးရောက် ပြည်သူတွေကလဲ ပြည်တွင်းကသူတို့အတွက် တတ်နိုင်တဲ့ ဘက်က နေပြီး ၀ိုင်းပြီး ပံ့ပိုးကြတယ်။ ဒီလို ပရဟိတ လုပ်နေတဲ့ ပုံတွေကို အင်တာနက်ကနေ ဖြန့်ပြီး ပို့လို့ ကူညီနိုင်အောင် နည်းလမ်းမျိုးစုံနဲ့ လုပ်ဆောင်ကြတယ်။

ဒီလို ပရဟိတ ပုံတွေကို ရိုက်ကူးပြီး ဒါကတော့ ငါ့ဓါတ်ပုံ ငါ့စာ စသည်ဖြင့် မူပိုင်ယူတာ ကျနော် တခါမှ မကြားခဲ့ဖူးဘူး။ ဒါပေမဲ့ ကျနော် ခု လက်တွေ့ မြင်နေခဲ့ရဖူးပြီ။ အံ့သြော်လို့ကို မဆုံးဘူး။ ဒါသည် ဒုက္ခရောက်နေတဲ့ လူတွေအတွက် လုပ်ထိုက်လုပ်သင့်တာတွေ လုပ်ပေးကြတယ်။ ဒါဟာ နိုင်ငံရေးမဟုတ်ဘူး ဒါ စစ်တိုက်နေ၊ စစ်ဖြစ်နေတာမဟုတ်ဘူး ဘယ်နေရာမှာ ဘာတင်တင်ပေါ့။ အဓိက တင်တယ်ဆိုတာမှာ မူရင်း ရေးသားသူကို Credit ပေးရင် အဆင်ပြေပါတယ်။ Credit မပေးလို့ တင်ခွင့်မပြုဘူး ဒါဆို လက်ခံနိုင်တယ်။ ဒါပေမဲ့ အားလုံးရည်ရွယ်ချက်က ရှင်းတယ် ကျနော်တို့ ပြည်ကြီးက ဒုက္ခရောက်နေတဲ့ မြန်မာလူမျိုးတွေ အတွက်။ ကိုယ့်ဆိုဒ်မှာ ကိုယ်တင်တယ် ကျန်တာမပေးတင်ဘူး ဘာဖြစ်လဲ လာမေး ဒါလူ့အခွင့်အရေးပဲ ကိုယ်ကြိုက်တာ ကိုယ်လုပ်ခွင့်ရှိတယ်။ ဘာမှ မဖြစ်ဘူး.........

ကိုယ် ဆိုဒ်မှာ တနေ့ လူအယောက် ၁ သိန်းလာကြည့်နေလား။ ကိုယ့်ရဲ့ စာ၊ ပုံတွေကို နေရာမျိုးစုံ မီဒီယာ မျိုးစုံကနေ တင်ခွင့် ပေးလိုက်ရင်ကော ကုသိုယ်ယူမဲ့ လူတွေ ပိုမများလားနိုင်ဘူးလား မစဉ်းစားတတ်တော့ဘူးလား လူတိုင်းမှာ ဦးနှောက်ရှိပါတယ်။ ဒီလို ပရဟိတ လုပ်နေတဲ့ ပုံ၊စာတွေကို နိုင်ငံရေးဆိုဒ်ပေါ် တင်လို့ ဒါ နိုင်ငံရေး လုပ်နေတာမဟုတ်ပါဘူး နိုင်ငံတော်ကို တော်လှန်နေတာ မဟုတ်ပါဘူး သိပ်မကြောက်ပါနဲ့ သိပ်အဖြစ်မသဲပါနဲ့ သိပ်ပြီး မကျော်ဇော်ချင်ပါနဲ့..... ဒါကိုယ်ဆွေမျိုး ကိုယ်ပြည်သူတွေ အတွက် တတ်နိုင်တဲ့ ဖက်က လုပ်ပေးနေတာပါ။ ဒါကြောင့် တခါတလေ ဒီလို လူမျိုး မြင်ရတာ ဗိုလ်ချုပ် ပြောသွားဖူးတဲ့ မှတ်သားဖွယ် စကားလေး ပြန်ကြားနေမိတယ် "ကျနော်တို့ မြန်မာတွေဟာ မဟုတ်တဲ့  နေရာမှာ တလွဲ ဆံပင် ကောင်း နေကြတယ်" တဲ့လေ....



မှတ်ချက်။ ။ ကျနော် Comment နဲ့ C-Box ကိုဖွင့်ထားပေးပါတယ်။ လွတ်လပ်စွာ ပြောပိုင်ခွင့် ရှိပါသည်။ ပိုစ့်နှင့် သက်ဆိုင်သော တုံ့ပြန့်မှုသာ ရလိုပါသည်။


လူသားတိုင်း လွတ်လပ်စွာ ဝေဖန်ပြောဆိုနိုင်ခွင့်၊ ငြင်းဆိုနိုင်ခွင့် ရှိပါသည်။


လေးစားလျက်


တောင်ပေါ်သား

ရွှေကိုမလို ရေကိုလိုသည်...

မတ်ဖန်မိသားစုဝင်များ၏ ရေအလှူအတွက် လေ့လာရေး ခရီးစဉ်

ယနေ့နံနက် စောစော မနက်ငါးနာရီခန့် အိပ်ယာမှ လူးလဲထကာ ခရီးစဉ်သို့ လိုက်ပါကြမည့် ကိုနော်နောင် နှင့် ကိုသီဟ တို့ထံ ဖုန်းအဆက်အသွယ် ရရှိပြီးသည်နှင့် ရန်ကုန်မြို့မှ သံလျင်မြို့နယ်အတွင်းရှိ ရေပြတ်လပ်နေသည်ဟု သတင်းများ ကြားထားရသော ကုလားဝဲ ကျေးရွာ၊ ညောင်လေးပင်ရွာ၊ ငါးပြေမ၊ ထော်သွန်၊ စစ်ပင်ကွင်း ကျေးရွာများသို့ အလှူခရီးစဉ်အကြို ကွင်းဆင်း လေ့လာရေး ခရီစဉ် စတင်ခဲ့သည်။



တစ်သက်နှင့်တစ်ကိုယ် တစ်ကြိမ်မှ မကြုံဖူးလောက်အောင် ရေခမ်းနေသော သောက်ရေကန်

ရန်ကုန်မြို့မှ သံလျင်တံတားမရောက်မှီ တိုင်းရင်းသားကျေးရွာဘေးမှလမ်းအတိုင်း ဒဂုံဆိပ်ကမ်းမြို့နယ်ဖက် ခရီးဆက်ခဲ့ရာ ရန်ကုန်မြစ်ကူးအပြီးတွင်ပင် လမ်းဘေးသို့ ဆင်းလိုက်ရာ ကုလားဝဲကျေးရွာ ကိုရောက်ရှိခဲ့သည်။ ကုလားဝဲ ကျေးရွာမှာ လူနေအိပ်ခြေ ၄၀၀ ခန့်ရှိသော ကျေးရွာအုပ်စုအဆင့် ရွာကြီးဖြစ်ပြီး ရေပြတ်လပ် နေသည်ဟု သတင်းကြီး နေသော ရွာလေး ဖြစ်သည်။ ကျေးရွာ ရယက ဥက္ကဌ ဦစိန်မောင်ဆင့် နှင့် တွေ့ဆုံပြီး ရေရှိမှု အနေအထားကို မေးမြန်းခဲ့ရာ လက်ရှိ အလှူရှင်များ၏ ရေအလှူဖြင့် ရပ်တည်နေကြောင်း၊ ရန်ကုန်မြို့တော် စည်/ပင် ကလည်း ရေကားတစ်စီး ပေးထားပြီး တနေ့လျင် ၄ ခေါက်ခန့် တိုက်နေကြောင်း၊ ၀မ်းပျက်ဝမ်းလျော ရောဂါများ ဖြစ်သည်အထိ မဆိုးရွားကြောင်း ၀မ်းမြောက်ဖွယ် သိရှိခဲ့ရသည်။ လမ်းတွင်လည်း ရေအလှူရှင်များနှင့် တွေ့ခဲ့ရသေးသည်။ တစ်ပိုင် တစ်နိုင် ကားလေးများပေါ် မိမိအိမ်ရှိ တိုင်ကီများ သွတ်ကန်များ တင်လာပြီး လာလှူနေသူများ ရှိသလို ရေသန့်ဗူးများ တင်လာပြီး သောက်သုံးရေ လာပေးဝေနေမှု များကိုလည်း တွေ့မြင်ခဲ့ရသည်။



ထော်သွန်ရွာလေးမှ ရေအလှူရှင်များကို စောင့်နေသူများ



စာရေးသူတို့ အနေဖြင့် ယခု ကုလားဝဲ ကျေးရွာထက် ပိုမိုအခြေအနေ ဆိုးသော ရွာများကို မတ်ဖန်အလှူရှင်များ၏ ရေအလှူအတွက် တိုက်ရိုက်လှူဒါန်း လိုသဖြင့် ခရီးဆက်ခဲ့ကြရာ ဒေသခံတို့၏ ညွန်းဆိုချက်များအရ ထော်သွန် ဆိုသော ရွာလေးသို့ လယ်ကွင်းများ အတိုင်း ကားဖြတ်မောင်းရင်း ခက်ခက် ခဲခဲ ရောက်ရှိလာခဲ့သည်။ ရွာထိပ်တွင် တံတားလေး ခံနေသဖြင့် ပေးသုံးဆယ်ခန့် သစ်သား တံတားလေးကို ကျော်လိုက်သည်နှင့် ညဥ့်အိပ်ပြီး ရေအလှူ စောင့်နေကြသူများ၊ ရေစည်လှည်းများ၊ အမျိုးသမီး အမျိုးသားနှင့် ကလေးငယ်များကို တွေ့လိုက်ရသည်။ တစ်နေကုန် စောင့်နေကြရ ခြင်းဖြစ်ကြောင်း လယ်ကွင်းများကို ဖြတ်လာရသည့် ရွာဖြစ်သဖြင့် တော်ရုံ ရေအလှူရှင်များ မရောက်လာ တတ်ကြကြောင်း ရွာထဲမှ ရွာသားများထက် ကွင်းထဲမှ လူများက ပိုမို အခက်တွေ့ကြောင်း ရှားရှား ပါးပါး ရောက်လာသော ရေအလှူရှင် ရောက်လာပြီဟု မြင်သည်နှင့် ရေပုံးဆွဲပြီး ပြေးလာသော်လည်း ကားနားအရောက် ရေကုန်နေသည်ကို တွေ့ရတတ်ကြောင်း ပြောပြခဲ့သဖြင့် မနက်ဖြန်တွင် မတ်ဖန် မိသားစုများ လှူဒါန်းထားသော ငွေဖြင့် ရေလာလှူပေးမည် ဖြစ်ကြောင်း အ၀ီဇီတွင်း တူးဖေါ်နိုင်ရန် အလှူငွေ လုံလောက်မည် ဆိုပါက ရေတွင်း တူးပေးမည် ဖြစ်ကြောင်း ပြောကြား နှင့်သိမ့်ရင်း ဒေသခံ ရေလိုအပ်နေသူများကို နုတ်ဆက်ရင်း ပြန်ခဲ့ကြသည်။ အပြန်လမ်းတွင် တွေ့ရသော ရေသန့်ဗူး အလှူရှင် ကားတစ်စီးကို တားပြီး ထော်သွန်ကျေးရွာသားများထံ သွားစေရန် မေတ္တာရပ်ခံလိုက် ကြသေးသည်။


ရေအလှူရှင် လာမလာ ကင်းစောင့်နေသော ကလေးငယ်

စာရေးသူ၏ လေ့လာ တွေ့ရှိချက်များအရ ဒေသခံများ ရင်ဆိုင်နေရသည့် အခြေအနေမှာ အ၀ီဇီရေကို အားကိုးပြီး နေသည့် ဒေသများ မဟုတ်ဘဲ ရေများကို ကန်တူးပြီး လှောင်ထားသည့် အတွက် ယခု မေလလယ်အထိ မိုးမရွာသောအခါ ကန်ရေများ ခမ်းခြောက်လာပြီး ရေပြတ်လပ်သည့် အခက်အခဲများ ရင်ဆိုင်နေကြရခြင်း ဖြစ်သည်။ အ၀ီဇီတွင်း တူးမည်ဆိုလျင် ပေါင် ၂၀၀ မှ ပေ ၄၀၀ အတွင်းသာ တူးလိုက်ပါက ရေလှိုင်လှိုင် ထွက်မည့် အနေအထား ဖြစ်နေပြီး၊ ကွန်ပရက်ဆာ၊ မှုတ်စက် ပိုက်တန်ဖိုး အပါ တစ်တွင်းလျင် ကျပ်ဆယ်သိန်းခန့်သာ ကုန်ကျမည့် အနေအထား ဖြစ်နေသည်။ ထို့ကြောင့်လည်း ရေတွင်းတူးပေး၇န် အစီအစဉ်ကိုသာ အာသီသ ဖြစ်နေမိသည်။


အလှူရှင်တို့ရေ ရေလိုနေပါတယ် လို့ ဆိုလိုဟန် တူပါတယ်။

ကုလားဝဲ၊ ငပြေမ၊ ညောင်လေးပင် ရွာများဖက်အပြီး သုံးခွမြို့နယ်ဖက် သွားရာလမ်းဘက်ခမ်းရှိ စစ်ပင်ကွင်းကျေးရွာဖက် ခရီးဆက်ခဲ့ပြန်သည်။ စာရေးသူ၏ ကားလေးမှာ မနေ့က မရမ်းချောင်းမှ ပြန်လာကတည်းက ဂီယာဘောက် ပျက်ချင်ချင် ဖြစ်နေသဖြင့် မနည်းထိန်းမောင်းရင်း မြေနီလမ်းလေးအတိုင်း စစ်ပင်ကွင်းရွာလမ်းသို့ ၀င်ရောက်ခဲ့ရာ လမ်းတွင် ခမ်းခြောက်နေသော ကန်များ မိုးအရွာကို စောင့်နေပုံများ ၀င်ရောက်လေ့လာ ဖြစ်ခဲ့သည်။ စစ်ပင်ကွင်းကျေးရွာ ကျောင်းတိုက်အတွင်းရှိ ရေကန်တွင် ရေခပ်နေသူများကို တွေ့သဖြင့် ကန်အခြေအနေကို ၀င်ရောက်လေ့လာမိပြန်သည်။ ကြာပန်းပင်များကြားရှိ ရေနောက်နောက်မှ ရေများကို မနက်မိုးလင်းသည်နှင့် လှည်းများဖြင့် လာရောက်ခပ်ရေခြင်းဖြစ်ကြောင်း နောက်လေးငါးရက် ဆိုလျင် ခမ်းသွားနိုင်သော အနေအထား ဖြစ်နေကြောင်း ဒေသခံ ရေခပ်သူများက ရှင်းပြကြသည်။ သြော် ဒီနေရာလေးမှာလည်း ရေတွင်းလေး တစ်တွင်းလောက် တူးပေးနိုင်ရင် ကောင်းလေစွ ဟု စာရေးသူ တွေးနေမိသည်။...


သောက်ရေရှာ ထွက်နေသူများ

အပြန်တွင် ရန်ကုန်မှ အလှူရှင်တစ်ဦးက လှူထားသော ဆယ်ဘီကားကြီးပေါ်သို့ တင်ဆောင်မည့် ရေယူနိုင်သော ရန်ကုန်မြို့ သာကေတ Capital စူပါမားကတ်ရှေ့ရှိ စည်ပင်ရေကန် ကိုလည်းကောင်း၊ ဆယ်ဘီးကားပေါ် တင်ဆောင်ရန် ငှါးထားသော တိုင်ကီအတွက်စရုံငွေ ပေးချေခြင်း ကိစ္စ၊ ရေသန့် ဗူးများ ရရှိရေးအတွက် ရွှေသံလျင် ရေသန့် ကိုယ်စားလှယ်အိမ်များ စသည်ဖြင့် လိုက်ပါတွေ့ဆုံ စီစဉ်ဖြစ်ခဲ့သည်။ မနက်ဖြန် မနက် ၆ နာရီမှ စတင်ပြီး အဆိုပါ ရေပြတ်လပ်နေသော ဒေသများသို့ ရေအလှူကိစ္စ ဆက်လက် ဆောင်ရွက်သွားမည် ဖြစ်သလို မတ်ဖန် မိသားစုဝင် အလှူရှင်များက ရေပြတ်လပ် သူများအတွက် ကူညီပေးရန်အတွက် ငွေလက်ခံ ရရှိမှု အခြေအနေကိုလည်း အောက်ပါအတိုင်း တင်ပြအပ်ပါသည်။


ရေတွင်းတူးပေးရန် အစီအစဉ် ရှိနေသည့် စစ်ပင်ကွင်း ဘုန်းကြီးကျောင်း


ရေခပ်နေရသည့် စစ်ပင်ကွင်း ရေကန်


ရေအလှူလာတယ်ဟေ့... မရဘဲနေမယ်ပြေးကြ...



ပြည်တွင်းမှ အလှူခံပေးနေသော အဖွဲ့ဝင်များ

(၁) ဦးဇော်လွင်ဝင်း
အခန်း - ၄၀၃, Excel Tower, ဗဟန်း၊ ရန်ကုန်မြို့။
ဖုန်း 01 559377 Ext: 6413 or 6403 or 6225

ငွေလွဲစနစ်ဖြင့် လွဲလိုသူများ
Account No. 0071220027265 (ရွှေဂုံတိုင်ကမ္ဘောဇဘဏ်)
Account Name. U ZAW LWIN WIN

(၂)နောင်နောင်=095138750(peaceboy)
(၃)ကိုသီဟ =099926417(Thiha Tun)
(၄)ကိုအောင် =200747 Ext:7812(aungmyinttun77)

ပြည်ပမှ အလှူခံပေးနေသော အဖွဲ့ဝင်များ
(၅)စင်္ကာပူနိုင်ငံအတွက် ကိုwathonelone( ကိုဝင်းထွန်းလင်း ) Ph : Bank Acc: 033 407 6544 ( DBS Saving Plus )
(၆)မလေးရှားနိုင်ငံအတွက် ကိုမင်းသူရ Ph : 60 123257475 Bank Acc: RHB Bank 112 059 013 56533
(၇)ရုရှားနိုင်ငံအတွက် ကိုကျောင်းသား Ph : 89037894871 [email]
(၈)ထိုင်းနိုင်ငံအတွက် ကို3dcr@zygunner .. [email]
(၉)တောင်ကိုရီးယားနိုင်ငံအတွက် ကိုစိုးထိုက် Ph : 010 27131184
(၁၀)တရုတ်နိုင်ငံအတွက် ကိုမင်းထွန်းထွန်းဝင်း Ph : 86-15882297927 ဘဏ်အကောင့် - 622202 4402007152733 -ICBC Bank (中国工商银行)

တို့ကို ဆက်သွယ် လှူဒါန်း နိုင်ကြပါတယ်ခင်ဗျာ

စာကြွင်း။ ။ MuTD မြန်မာဘောလုံး ချစ်သူတို့ ဆုံဆည်းရာ ဆိုဒ်မှ ကူးယူဖော်ပြပေးပါတယ်။



လူသားတိုင်း လွတ်လပ်စွာ ဝေဖန်ပြောဆိုနိုင်ခွင့်၊ ငြင်းဆိုနိုင်ခွင့် ရှိပါသည်။


လေးစားလျက်


တောင်ပေါ်သား

ဆေးလိပ်


အရောင်အသွေး တံဆိပ်စုံလို့
ဖွာသူရင်မှာ ခိုက်စေတယ်
တဖွာရှိုက်လိုက် တကြောင်းရေးလိုက်
စာရေးဆရာ အသဲစွဲ
တရှိုက်ရှူလိုက် တငုံသောက်လိုက်
ယမကာသမားများ အကြိုက်

အဖြူရောင်နဲ့ ရွှေဝါရောင်ခံ
စီးကရက်ဆိုတာ
လူသာမာန်များ နှစ်သက်ကြသည်
တို့ဓလေ့ထုတ် အစိမ်းရောင်လိပ်
တောသူတောင်သား ကြိုက်ကြလေ၏
စာရွှက်ကိုဖြန့် ဆေးမှုန့်ကိုထည့်
ဖွာသူများလဲ တွေ့ခဲ့ဖူးသည်

အကျဉ်းကျခံ လူသားအဖို့
သည်ဆေးလိပ်သာ သူ၏အဖော်
ထမင်းစားပြီး အပျင်းလဲပြေ
ခံတွင်းရှင်းဖို့ တဖွာတရှိုက်
သူတို့သောက်သည်

ဆေးလိပ်ကိုဝယ် ရောဂါကိုပွား
မကြိုက်သူတို့ ရှုံ့မဲ့ကြသည်
ဦးနှောက်ကြည်လင် စဉ်းစားဥာဏ်တိုး
ကြိုက်သူများက ပြောကြပြန်သည်….
အငွေ့ကိုထုတ် ဟန်ရေးလုပ်လို့
ကာလသားများ လူပျိုလှည့်သည်

လက်တွေ့ဘ၀
ဖွာလိုက်ရှိုက်လိုက် ဒီပါးစပ်မှာ
အငွေ့တွေများ မီးရထားပမာ
အချိန်တွေကြာ ဒီဆေးလိပ်တိုဘ၀
အဆုံးမှာတော့ ဖင်စီခံတာ ကျန်ခဲ့တာမို့
အသုံးမ၀င် အပစ်ခံဘ၀


လူသားတိုင်း လွတ်လပ်စွာ ဝေဖန်ပြောဆိုနိုင်ခွင့်၊ ငြင်းဆိုနိုင်ခွင့် ရှိပါသည်။


လေးစားလျက်


တောင်ပေါ်သား

အပြုအမှု အပြောအဆို

ကျနော် ဒီနေ့ အလုပ်ကိုလာဖို့ မနက်စောစော MRT လို့ခေါ်တဲ့ ရထားကို စီးရင်း လူအချို့ရဲ့ အပြုအမူတွေ အကျင့်စရိုက်တွေကို ကြည့်ပြီး တွေးနေမိပါတယ်။ လူတွေဟာ ပတ်ဝန်းကျင် အနေအထားပေါ် မူတည်ပြီး အကျင့်၊သိက္ခာတွေ ပြောင်းလဲလာရပါတယ်။ တခါတရံ သိမ့်မွေ့နူးညံတဲ့ လူတွေ တွေ့ရသလို အခါတရံတော့လဲ ရင့်သီးတဲ့ အပြောအဆိုနဲ့ ဆက်ဆံတတ်တဲ့ လူတွေကို တွေ့ရပါတယ်။ တခါတလေ အပြင်ပန်းသိမ့်မွေ့သလောက် အတွင်းစိတ်ထား ကောက်ကျစ်တတ်တဲ့ လူအချို့ကိုလဲ ရင်ဆိုင်ရပြန်ပါတယ်။

စင်ကာပူက ရထားတွဲလေးတွေမှာ ထိုင်ခုံလေးတွေ ရှိပါတယ်။ အစွန်ဆုံး ၂ နေရာကိုတော့ ပုံမှန်လူတွေထက် အကြောင်းအမျိုးမျိုးကြောင့် ပိုလိုအပ်တဲ့လူတွေအတွက် နေရာပေးဖို့ သတိပေးထားတာ ရှိပါတယ်။ ဥပမာ ကိုယ်ဝန်ဆောင်သည်၊ ဒုက္ခရောက်နေတဲ့ လူတွေ၊ အဖိုးအဖွားတွေ၊ ကလေးငယ်လေးတွေ အတွက်ပေါ့.... ဒီနေရာမှာ ကွာခြားတာက လူမျိုးပါပဲ ကျနော်မြန်မာပြည်က ပေါက်ဖွားလာတဲ့ လူတွေအတွက် (ဘာသာစုံ) လူကြီး၊မိဘတွေကို ရိုသေလေးစားတတ်သလို ကလေးငယ်လေးတွေကိုလဲ ချစ်ခင်စွာ ကြင်နာတတ်ပါတယ်။ အကျဉ်းပြောရရင်တော့ မြန်မာလူမျိုးအများစုဟာ ဒီလိုနေရာမျိုးလေးမှာ တော်ရုံ ထိုင်ခဲပါတယ် တကယ်လိုအပ်တဲ့ လူတွေကို နေရာပေးလေ့ရှိပါတယ်။ စလုံးလူတွေကတော့ မသိကျိုးကျွန်ပြုပြီး ဟန်ပန်တခွဲသားနဲ့ ထိုင်နေလေ့ရှိတာ တွေ့ရပါတယ်။ ဤသို့ စလုံးနိုင်ငံသားအများစု ပြုမှုတတ်သော အပြုအမှုနေရာမှာ မြန်မာနိုင်ငံသား တယောက် လုပ်ပြနေတာမြင်ရတော့ ရင်ထဲမှာ မပြောပြတတ်သော ခံစားချက်တခု ဖြစ်နေမိသည်

အဲ့လို မြင်နေမိတာကို ကိုယ့်ဟာကိုယ် သေချာပြန်စဉ်းစားမိတော့ ကျနော်လဲ ဒီနေရာလေးမှာ နေလာတာကြာလာတာနဲ့အမျှ ကိုယ့်ရဲ့ သိစိတ်၊ မသိစိတ်တွေကနေ ပြောင်းလဲခဲ့တာတွေ အတော်ကို များလာခဲ့ပါပြီ။ အရင်ရောက်ခါစကလို ရထားစီးရင်း ကိုယ်နေရာလေးတခုရရင် သူများကို နေရာပေးတတ်တဲ့ အကျင့်တွေ ရှိတတ်လာပြီ။ အပြောအဆိုတွေလဲ တဖြေးဖြေး ရင့်သီးလာခဲ့ပြီလို့ ကိုယ့်ဟာကိုယ် ထင်မိပါတယ်။ မိသားစု အသိုင်းအဝိုင်းဝေးလို့ တယောက်ထဲ နေတတ်တဲ့ အကျင့်တွေလဲ ရှိနေပြန်ပါပြီ။ ငွေရဖို့အတွက် ဘယ်လိုပဲ ဖြစ်ဖြစ်လုပ်မဲ့ လူတွေနဲ့ စာရင်တော့ အနဲငယ် ခံသာပါသေးတယ်လို့ ဖြေတွေးတွေးမိရင်းနဲ့.....

ကျနော်တို့တွေသာ နေရာတွေ ဘယ်လောက်ပြောင်းပြောင်း သန့်ရှင်းတဲ့ စိတ်ဓါတ်၊ မြင့်မြတ်တဲ့ အကျင့်တွေ မပျောက်ပျက်အောင် ထိန်းသိမ်းနိုင်မယ်ဆို ကျနော်တို့ တိုင်းပြည်အတွက် နာမည်ကောင်း ထွက်လာစေမှာပါ.... ဒါကလဲ တိုင်းပြည်ကို အကျိုးပြုနေတဲ့ နည်းလမ်းတွေထဲက တခုမဟုတ်ပါဘူးလား........

မြန်မာတွေအားလုံး မြန်မာလို နေတတ်ကြပါစေ.......

လူသားတိုင်း လွတ်လပ်စွာ ဝေဖန်ပြောဆိုနိုင်ခွင့်၊ ငြင်းဆိုနိုင်ခွင့်  ရှိပါသည်။

လေးစားလျက်

တောင်ပေါ်သား

အမှန်တရား

[stextbox id="grey"]

“ အမေ.... သားပါ... အမေ နေကောင်းလား အမေ...... ”

“...................... ”

“အင်းးးးးးး ဟုတ်တယ်...... သား ဒီလ လစာထုတ်ရင် အိမ်ပြန်မပို့နိုင်ဘူး အမေ....  အမေတို့ အဆင်ပြေနိုင်လား..... ”

“...................... ”

“......................အင်း ဟုတ်တယ်..... သား Passport လဲ သက်တမ်းတိုးရဦးမယ်.... အခွန်လဲ ဆောင်ရမယ်..... အင်းးးးးးးးးးးးးး ဟုတ်တယ်........ ”

“...................... ”

“......................သူဌေးကတော့ ကောင်းပါတယ်.... ဟို Agent က အပြောနဲ့ အလုပ် မညီဘူးအမေ.... သားကို ၅၀၀ ကျော်လေးပဲ ပေးတယ်... သား OT ရရင်တော့ တလကို ၈၀၀ လောက်တော့ ရပါတယ် စားတာလေးတွေ ပြန်နုတ်လိုက်တော့ နဲနဲတော့  စုဖြစ်ပါတယ်အမေ.... ”

“...................... ”

“......................အင်းးးးးးးးးး အားလုံးအဆင်ပြေပါတယ် အမေ.... သားအတွက် စိတ်မပူနေနဲ့..... အမေတို့သာ အဆင်ပြေအောင်နေပါ.......... ”

“...................... ”

“......................အင်းးးးးး... ဒါဆို ဒါပဲလေ အမေ.... အမေ နေကောင်းအောင် နေနော် သားနောက်တလတော့ ပိုက်ဆံ ပို့ဖြစ်အောင် ပို့လိုက်ပါမယ်..... ”

[/stextbox]




လောကမှာ ကျရာနေရာကနေ လူပီသတဲ့ လူတယောက်ဖြစ်ဖို့ ကြိုးစားနေကြတဲ့ လူတွေ အများကြီးထဲက ကျနော် မသိတဲ့ မရင်းနှီးဖူးတဲ့ လူငယ်တယောက်ရဲ့ ပြောစကားလေးတွေပါ...  ထာဝရ အမှတ်ရနေမှာပါ........



လူသားတိုင်း လွတ်လပ်စွာ ဝေဖန်ပြောဆိုနိုင်ခွင့်၊ ငြင်းဆိုနိုင်ခွင့် ရှိပါသည်။


လေးစားလျက်


တောင်ပေါ်သား
Subscribe to: Posts (Atom)
Blogger Template by Clairvo